ကချင်ပြည်နယ်ဝန်ကြီးချုပ် တိုင်းရင်းသားစာပေနှင့်ယဉ်ကျေးမှုကော်မတီအသင်း/အဖွဲ့(၁၀)ဖွဲ့ထံ တိုင်းရင်းသားပုံပြပုံပြင် စာအုပ်(၂၀၀၀၀) ကျော် ဖြန့်ဝေပေးအပ်သည့်အခမ်းအနားသို့ တက်ရောက်အမှာစကားပြောကြား

မြစ်ကြီးနား     ဇွန် ၃၀

တိုင်းရင်းသားလူမျိုးများရေးရာဝန်ကြီးဌာန၊ တိုင်းရင်းသားစာပေနှင့် ယဉ်ကျေးမှုဦးစီးဌာန၊ ကချင်ပြည်နယ်ရုံးမှ ပြည်နယ်အတွင်းရှိ တိုင်းရင်းသားစာပေနှင့် ယဉ်ကျေးမှုကော်မတီအဖွဲ့များထံ တိုင်းရင်းသားပုံပြပုံပြင်စာအုပ်များ ဖြန့်ဝေပေးအပ်ပွဲ အခမ်းအနားကို ဇွန် ၃၀ ရက် နံနက် ၈ နာရီက အဆိုပါဦးစီးဌာနရုံးရှိ အစည်းအဝေးခန်းမ၌ ကျင်းပပြုလုပ်ရာ ပြည်နယ်ဝန်ကြီးချုပ် တက်ရောက် အမှာစကားပြောကြားသည်။

အခမ်းအနားတွင် ကချင်ပြည်နယ်ဝန်ကြီးချုပ် ဦးခက်ထိန်နန်က တိုင်းရင်းသားစာပေနှင့် ယဉ်ကျေးမှုအသင်းအဖွဲ့များအနေဖြင့် ယနေ့ပေးအပ်မည့် ပုံပြပုံပြင်စာအုပ်များကို ကလေးများထံ ကျယ်ကျယ်ပြန့်ပြန့်ဖြန့်ဖြူးပေးရန် လိုအပ်ပါကြောင်း၊ သို့မှသာ တိုင်းရင်းသားကလေးများအနေဖြင့် မိမိဘာသာစာပေကို သင်ကြားခွင့်ရရှိသည့်အပြင် အခြားဘာသာစာပေများကို သင်ယူလေ့လာရာတွင် လည်း နားလည်မှုစွမ်းရည်ပိုမိုဖွံဖြိုးတိုးတက်စေမည်ဖြစ်ပါကြောင်း၊ ထိုအပြင် တိုင်းရင်းသားဘာသာ စာပေ သင်ကြားရေးနှင့်ပတ်သက်၍ ယခင်ကထက် ကျယ်ကျယ်ပြန့်ပြန့်ဆောင်ရွက်လာပြီဖြစ်သည့် အတွက် တိုင်းရင်းသားများအနေဖြင့်မိမိတို့စာပေဖွံ့ဖြိုးတိုးတက်ရေး ရရှိလာသည့် အခွင့်အရေးများကို လက်လွတ်မခံဘဲ အတူတကွလက်တွဲကြိုးပမ်းဆောင်ရွက်ရန်လိုကြောင်း တိုက်တွန်းမှာကြားသည်။

ဆက်လက်၍ ပြည်နယ်တိုင်းရင်းသားရေးရာဝန်ကြီး ဦးကျော်မင်းခိုင်က တိုင်းရင်းသားဘာသာ နှင့် မြန်မာဘာသာ(၂)မျိုးဖြင့် ပုံနှိပ်ထုတ်ဝေထားသည့် ပုံပြပုံပြင်စာအုပ်ပေါင်း (၂၃၇၄၆)အုပ်ကို တိုင်းရင်းသားစာပေနှင့် ယဉ်ကျေးမှုအသင်း/ အဖွဲ့များထံ ပေးအပ်သွားမည့် အစီအစဉ်များနှင့် စပ်လျဉ်း၍ ရှင်းလင်းတင်ပြသည်။

ယင်းနောက် ပြည်နယ်ဝန်ကြီးချုပ်၊ ပြည်နယ်တရားလွှတ်တော်တရားသူကြီးချုပ်၊ ပြည်နယ် ဝန်ကြီးများ၊ ပြည်နယ်ဥပဒေချုပ်၊ တိုင်းရင်းသားအခွင့်အရေးများကာကွယ်စောင့်ရှောက်ရေးဦးစီးဌာန၊ ညွှန်ကြားရေးမှူးနှင့် တိုင်းရင်းသားစာပေနှင့်ယဉ်ကျေးမှုဦးစီးဌာန၊ ပြည်နယ်တာဝန်ခံတို့က တိုင်းရင်း သားဘာသာ/ မြန်မာဘာသာဖြင့် ပုံနှိပ်ထုတ်ဝေထားသည့် ဂျိန်းဖော့ (၄၈၀၀)အုပ်၊ လော်ဝေါ် (၃၁၂၀) အုပ်၊ လာချိဒ် (၁၄၇၀)အုပ်၊  ဇိုင်ဝါး (၄၈၀)အုပ်၊ လီဆူ (၂၁၀၀)အုပ်၊ ရဝမ် (၃၆၀၀) အုပ်၊ တိုင်းလိုင် (၃၈၄၀)အုပ်၊ တိုင်းလေ (၂၈၀၈)အုပ်၊ တိုင်းခမ်းတီ (၁၀၈၀)အုပ်နှင့် ဗမာ (၄၄၈)အုပ်တို့ဖြင့် ပုံပြစာအုပ် စုစုပေါင်း(၂၃၇၄၆)အုပ်ကို စာပေနှင့်ယဉ်ကျေးမှုအသင်း/အဖွဲ့(၁၀)ဖွဲ့တို့မှတာဝန်ရှိသူများထံ အသီးသီး ထောက်ပံ့ပေးအပ်ခဲ့ကြရာ တိုင်းရင်းသားစာပေနှင့် ယဉ်ကျေးမှုအသင်း/ အဖွဲ့များကိုယ်စား တိုင်းလိုင် စာပေနှင့်ယဉ်ကျေးမှုကော်မတီဥက္ကဋ္ဌ ဒေါ်ခင်ပြုံးရည်က ကျေးဇူးတင်စကား ပြန်လည်ပြောကြား ခဲ့သည်။

ထို့နောက် ပြည်နယ်ဝန်ကြီးချုပ်နှင့် တာဝန်ရှိသူများ၊ တိုင်းရင်းသားစာပေနှင့်ယဉ်ကျေးမှု အသင်း/ အဖွဲ့တာဝန်ရှိသူများက တိုင်းရင်းသားဘာသာပုံပြပုံပြင်စာအုပ်များကို လှည့်လည်ကြည့်ရှု လေ့လာခဲ့ကြသည်။

ကချင်ပြည်နယ်တိုင်းရင်းသားစာပေနှင့်ယဉ်ကျေးမှုဦးစီးဌာနအနေဖြင့် ဝန်ကြီးဌာနမှ ပုံနှိပ်ဖြန့် ဝေထားသည့် တိုင်းရင်းသားပုံပြပုံပြင်စာအုပ်များကို ၂၀၁၉-၂၀၂၀ ပညာသင်နှစ်တွင် (၁)ကြိမ်၊ ၂၀၂၀ – ၂၀၂၁ ပညာသင်နှစ်တွင် (၁)ကြိမ်နှင့် ယခုနှစ်အတွက် (၁)ကြိမ် စုစုပေါင်း (၃)ကြိမ်အတွက် ပုံပြပုံပြင် စာအုပ်ပေါင်း (၇၁၂၃၈)အုပ်ကို ပေးအပ်နိုင်ခဲ့ပြီး ပညာရေးဝန်ကြီးဌာနနှင့် ပူးပေါင်း၍ ၂၀၂၂- ၂၀၂၃ ပညာသင်နှစ်အတွက် ပြည်နယ်အတွင်း အခြေခံပညာကျောင်းများတွင် တိုင်းရင်းသားဘာသာသင် ဆရာ/ ဆရာမ (၇၄)ဦးကိုလည်း ခန့်အပ်ထားပေးပြီးဖြစ်ကြောင်း သိရှိရသည်။