မြစ်ကြီးနား မတ် ၂၈
ကချင်ပြည်နယ်အစိုးရအဖွဲ့အနေဖြင့် မြစ်ကြီးနားမြို့အား ဧရာဝတီမြစ်ရေတိုက်စားမှုမှ ကြိုတင်ကာကွယ်နိုင်ရေးအတွက် ကျောက်စီရေထိန်းနံရံ၊ ရေလျှံတားနံရံများ၊ ရေထိန်းတံခါးများနှင့် မြစ်ကြောင်း ဖွံ့ဖြိုးရေးဆိုင်ရာ လုပ်ငန်းများကို ဆောင်ရွက်သွားမည်ဖြစ်ပြီး အဆိုပါလုပ်ငန်းစီမံကိန်းများအနက် ဧရာဝတီမြစ်ကြောင်း ရှင်းလင်းရေးလုပ်ငန်းကို ပြည်နယ်အစီအစဉ်ဖြင့် လုပ်ငန်းရှင်များနှင့် ပူးပေါင်းဆောင်ရွက်လျက်ရှိရာ ပြည်နယ်ဝန်ကြီးချုပ် ဦးခက်ထိန်နန်သည် မတ် ၂၈ ရက် နံနက်ပိုင်း က ဗလမင်းထင်တံတားအောက်ဘက်ရှိ သဲသောင်ရှင်းလင်းရေးလုပ်ငန်းအား ကွင်းဆင်းစစ်ဆေးခဲ့ကြသည်။
ထိုသို့ ကွင်းဆင်းဆောင်ရွက်ရာတွင် ပြည်နယ်ဝန်ကြီးချုပ်သည် ပြည်နယ်အစိုးရအဖွဲ့ဝင် ဝန်ကြီးများ၊ ပြည်နယ်အဆင့်ဌာနဆိုင်ရာတာဝန်ရှိသူများနှင့်အတူ ရှေးဦးစွာ ဗလမင်းထင်အမှတ် (၂) တံတားတည်ဆောက်ရေးစီမံကိန်းနေရာမှ တစ်ဆင့် သဲကျောက်ကားများ ဖြတ်သန်းသွားလာမှု အခြေအနေများကို လည်းကောင်း၊ တံတားသစ်တည်ဆောက်ရေးအတွက် ရေလယ်တိုင်များ (RP-3 , RP-4, RP-5) များ တည်ဆောက်နေမှုအခြေအနေများကို လည်းကောင်း လှည့်လည်ကြည့်ရှုစစ်ဆေး ခဲ့ကြပြီး သဲကျောက်တင်ကားများ ဖြတ်သန်းသွားလာရာတွင် တံတားစီမံကိန်းလုပ်ငန်းအား အနှောင့်အယှက်မဖြစ်စေရေး စနစ်တကျ ကြီးကြပ်ကွပ်ကဲဆောင်ရွက်နိုင်ရေး တာဝန်ရှိသူများနှင့်ပေါင်းစပ် ညှိနှိုင်းဆောင်ရွက်ပေးခဲ့သည်။
ယင်းနောက် သဲကျောက်ရှင်းလင်းရေးအတွက် မူလလျာထားသည့် အလျား ၆၀၀၀ ပေ၊ အကျယ် ၂၄၀ ပေနှင့် အနက် ရေစစ်မျဉ်းအောက် ၂ မီတာအစား မြစ်ရေအတက်အကျတိုင်းတာချက် အပေါ်မူတည်၍ အလျား ၅၀၀၀ ပေ၊ အကျယ် ၁၆၅ ပေ၊ အနက်ရေစစ်မျဉ်းအောက် ၂ မီတာအထိ တူးဖော်ရှင်းလင်းနိုင်ရေး ပြည်နယ်အစီအစဉ်ဖြင့် ဒေသတွင်းသဲကျောက်လုပ်ငန်းရှင်များအား ဖိတ်ခေါ်ပြီး လုပ်ငန်းဆိုင်ရာစည်းမျဉ်းစည်ကမ်း (SOP)များ ချမှတ်၍ လုပ်ကွက်(၁၃)နေရာ လျာထား သတ်မှတ်ဆောင်ရွက်လျက်ရှိသည့် လုပ်ကွက်များအတွင်း လုပ်ငန်းများစတင်ဆောင်ရွက်နေမှုကို လှည့်လည်ကြည့်ရှုစစ်ဆေးခဲ့ကြပြီး မြစ်ရေမြင့်တက်လာခြင်းမရှိမီ လုပ်ငန်းများ အရှိန်အဟုန်ဖြင့် ပြီးစီးအောင် ဆောင်ရွက်နိုင်ရေး၊ သဲကျောက်ကားကြီးများ အဝင်/ အထွက်လမ်းများ စနစ်တကျ ဖောက်လုပ်သယ်ယူနိုင်ရေး တာဝန်ရှိသူများနှင့် ပေါင်းစပ်ဆောင်ရွက်ပေးခဲ့သည်။
ထို့နောက် ပြည်နယ်ဝန်ကြီးချုပ်သည် ပြည်နယ်အစိုးရအဖွဲ့ရုံး မလိခခန်းမ၌ ပြည်ထောင်စု သမ္မတမြန်မာနိုင်ငံ၊ ကချင်ပြည်နယ်အစိုးရအဖွဲ့နှင့် တရုတ်ပြည်သူ့သမ္မတနိုင်ငံ၊ ယူနန်ပြည်နယ်၊ နုကျန်းပြည်နယ်ခွဲ ပြည်သူ့အစိုးရအဖွဲ့တို့အကြား အလုပ်အကိုင်အခွင့်အလမ်းများနှင့်စပ်လျဉ်း၍ ပူးပေါင်းဆောင်ရွက်နိုင်ရေး နားလည်မှုစာချွန်လွှာ(မူကြမ်း)ပါအချက်များအပေါ် စာချွန်လွှာစိစစ်ရေး ကော်မတီအဖွဲ့ဝင်များနှင့် လုပ်ငန်းညှိနှိုင်းဆွေးနွေးခဲ့ကြသည်။
အဆိုပါလုပ်ငန်းညှိနှိုင်းအစည်းအဝေးတွင်ပြည်နယ်ဝန်ကြီးချုပ်က ယခုဒီနားလည်မှုစာချွန်လွှာကို ကချင်ပြည်နယ်အစိုးရအဖွဲ့အပါအဝင် ကော်မတီအဖွဲ့ဝင်များ၏ အားတက်သရောစိတ်ပါဝင်စားစွာ ဆွေးနွေးကြပြီး နှစ်ဖက်အကျိုးဖြစ်ထွန်းစေရေးအတွက် သင့်လျော်သော ပြင်ဆင်ချက်များကို အားထုတ်ဆောင်ရွက်နေခြင်းဖြစ်ပါကြောင်း၊ ထို့အပြင် ပြည်ထောင်စုအဆင့် သက်ဆိုင်ရာဝန်ကြီးဌာနများ၏ သဘောထားမှတ်ချက်များကိုလည်း ယခု MOU စိစစ်ပြင်ဆင်ရေးတွင် များစွာအထောက် အကူပြုပါကြောင်း၊ သို့ဖြစ်ပါ၍ မိမိတို့ပြည်နယ်ဖွံ့ဖြိုးတိုးတက်ရေးကို ဖြစ်ထွန်းစေရေး ယူနန်ပြည်နယ်၊ နုကျန်းပြည်နယ်ခွဲနှင့် နယ်ပယ်ပေါင်းစုံတွင် ပူးပေါင်းဆောာင်ရွက်နိုင်ရန် နားလည်မှုစာချွန်လွှာ (MOU)ကို လက်မှတ်ရေးထိုးနိုင်ရေး တတ်အားသရွေ့ ဆက်လက်ဝိုင်းဝန်းဆောင်ရွက်ကြရန် လိုအပ်ပါကြောင်း တိုက်တွန်းမှာကြားသည်။
ထို့နောက် နားလည်မှုစာချွန်လွှာ စိစစ်ရေးကော်မတီအဖွဲ့ ဥက္ကဋ္ဌ၊ ပြည်နယ်စီးပွားရေးရာ ဝန်ကြီး ဦးမျိုးဆွေက ယခင်အစည်းအဝေးများတွင် နားလည်မှုစာချွန်လွှာ (မူကြမ်း) ပါအချက်များအား ဖြည့်စွက်ပြင်ဆင်ဆောင်ရွက်ချက်များနှင့် ယနေ့ အစည်းအဝေးတွင် ဆွေးနွေးဆောင်ရွက်သွား ရမည့်အချက်များကို ရှင်းလင်းတင်ပြပြီး စိစစ်ရေးကော်မတီအဖွဲ့ အတွင်းရေးမှူး၊ ပြည်နယ်ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန၊ ပြည်နယ်ဦးစီးမှူး ဒေါက်တာသိမ့်သိမ့်မိုးက နားလည်မှုစာချွန်လွှာပါ အချက်များနှင့်စပ်လျဉ်း၍ ပြင်ဆင်ဖြည့်စွက်ဆောင်ရွက်နိုင်ရေး စိစစ်ချက်များနှင့် တရုတ်နိုင်ငံဘက်သို့ သံတမန်နည်းလမ်းဖြင့် ပြန်လည်ပေးပို့ မေးမြန်းရမည့်ကိစ္စရပ်များကို တင်ပြရာ ကော်မတီအဖွဲ့ဝင်များ ဝိုင်းဝန်းအကြံပြုသုံးသပ်ဆွေးနွေးခဲ့ကြကာ ပြည်နယ်ဝန်ကြီးချုပ်က လိုအပ်သည်များကို လုပ်ထုံးလုပ်နည်းနှင့်အညီဖြစ်စေရေး ဖြည့်စွက်ပြင်ဆင်ဆောင်ရွက်နိုင်ရေး ညှိနှိုင်း ပေါင်းစပ်ဆောင်ရွက်ပေးခဲ့သည်။
ယင်းနောက် မွန်းလွဲပိုင်းတွင် အဆိုပါအစည်းအဝေးခန်းမ၌ ပြည်နယ်ဝန်ကြီးချုပ်သည် ပြည်နယ်အစိုးရအဖွဲ့ဝင်များ၊ ပြည်နယ်အဆင့်ဌာနဆိုင်ရာများ၊ ကချင်တိုင်းရင်းသားမျိုးနွယ်စု (၆) မျိုးမှ တာဝန်ရှိသူများနှင့်တွေ့ဆုံပြီး ကချင်မျိုးနွယ်စု (၆)မျိုး၏ တိုင်းရင်းသားဝတ်စုံမှန် သတ်မှတ်နိုင်ရေး လုပ်ငန်းညှိနှိုင်းအစည်းအဝေးကို ကျင်းပြုလုပ်ခဲ့ကြသည်။
အဆိုပါ လုပ်ငန်းညှိနှိုင်းအစည်းအဝေးတွင် ပြည်နယ်ဝန်ကြီးချုပ်က တိုင်းရင်းသားတို့၏ စာပေနှင့် ရိုးရာယဉ်ကျေးမှုကို ထိန်းသိမ်းခြင်းသည် အရေးကြီးသည့် လုပ်ငန်းစဉ်တစ်ရပ်ဖြစ်သကဲ့သို့ မိမိတို့ ၏ ဝတ်စားဆင်ယင်မှု၊ မိမိတို့ဝတ်စုံသည်လည်း အဓိကအရေးကြီးပါကြောင်း၊ သို့ဖြစ်ပါ၍ မိမိတို့၏ အမျိုးသားဝတ်စုံမှန် သတ်မှတ်နိုင်ရေး မိမိတို့ဝတ်စားဆင်ယင်ထုံးဖွဲ့မှုကို မှန်ကန်တိကျစွာ သတ်မှတ်၍ ဝတ်စုံအစိတ်အပိုင်းတစ်ခုချင်းအလိုက် အဓိပ္ပါယ်ဖွင့်ဆိုဖော်ပြချက်များဖြင့် ပြည့်စုံအောင် စနစ်တကျ မှတ်တမ်းတင်ပြုစု၍ ပြည်ထောင်စုသို့ ပေးပို့နိုင်ရေးအားလုံးက ပေါင်းစပ်ဆောင်ရွက်ကြရန် လိုအပ်မည်ဖြစ်ပါကြောင်း တိုက်တွန်းမှာကြားသည်။
ဆက်လက်၍ ပြည်နယ်တိုင်းရင်းသားရေးရာဝန်ကြီး ဦးကျော်မင်းခိုင်က တိုင်းရင်းသားမျိုးနွယ် စုများအတွက် အရေးကြီးသည့် ဝတ်စုံမှန်သတ်မှတ်နိုင်ရေး သက်ဆိုင်ရာမျိုးနွယ်စုများအလိုက် လိုအပ်ချက်များ၊ ကွဲလွဲချက်များကို ပြင်ဆင်ဖြည့်စွက်နိုင်ရေးအတွက် သတ်မှတ်ချက်များကို ရှင်းလင်းတင်ပြ ပြီး ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ မြစ်ကြီးနားယဉ်ကျေးမှုပြတိုက် တာဝန်ခံ ဒေါ်သူဇာစံက မြန်မာနိုင်ငံတိုင်းရင်းသားလူမျိုးများ အမျိုးသားဝတ်စုံမှန်သတ်မှတ်နိုင်ရေး လုပ်ငန်း ညှိနှိုင်းအစည်းအဝေးများ ကျင်းပပြုလုပ်ခဲ့မှုနှင့် အစည်းအဝေးဆုံးဖြတ်ချက်များပါ အချက်အလက်များ၊ ကချင်မျိုးနွယ်စုများဖြစ်သည့် ဂျိမ်းဖော၊ လာချိဒ်၊ လော်ဝေါ်၊ ဇိုင်းဝါး၊ လီဆူ၊ ရဝမ်စသည့် မျိုးနွယ် စုအလိုက် အမျိုးသား/ အမျိုးသမိး ဝတ်စုံများ၊ ဆင်ယင်ထုံးဖွဲ့မှုများကို သတ်မှတ်ချက်များနှင့် အဓိပ္ပါယ်ဖွင့်ဆိုချက်များကို ရှင်းလင်းတင်ပြရာ တက်ရောက်လာကြသည့် တိုင်းရင်းသားမျိုးနွယ်စုများ က မျိုးနွယ်စုအလိုက် ဝတ်စားဆင် ယင်ထုံးဖွဲ့မှုများနှင့် အဓိပ္ပါယ်သတ်မှတ်ချက်များအပေါ် လိုအပ် ချက်များကို ဖြည့်စွက်ပြင်ဆင်နိုင်ရေး ဆွေးနွေးဆောင်ရွက်ခဲ့ကြသည်။
တင်ပြဆွေးနွေးမှုများအပေါ် ပြည်နယ်ဝန်ကြီးချုပ်က တိုင်းရင်းသားဝတ်စုံအမှန်များ စနစ် တကျ ပြည့်စုံမှန်ကန်အောင်၊ အထောက်အထား ပြည့်စုံစွာဖြင့် တင်ပြနိုင်ရေး သက်ဆိုင်ရာဌာနနှင့် တိုင်းရင်းသားမျိုးနွယ်စုများအကြား ညှိနှိုင်းပေါင်းစပ်ဆောင်ရွက်ပေးခဲ့သည်။
ထို့အတူ ပြည်နယ်ဝန်ကြီးချုပ်နှင့် ဇနီး၊ ပြည်နယ်တရားလွှတ်တော်တရားသူကြီးချုပ်၊ ပြည်နယ်အစိုးရအဖွဲ့ဝင် ဝန်ကြီးများနှင့် ၎င်းတို့၏ ဇနီးများ၊ ပြည်နယ်ဥပဒေချုပ်တို့သည် ယမန်နေ့ ညနေ ၆ နာရီကလည်း နှစ် (၈၀)ပြည့် တပ်မတော်နေ့ အထိမ်းအမှတ်အဖြစ် မြောက်ပိုင်းတိုင်းစစ်ဌာနချုပ်၊ ဗလမင်းထင်ခန်းမ၌ ကျင်းပပြုလုပ်သည့် ဂုဏ်ပြုညစာစားပွဲသို့ တက်ရောက်ပြီး တိုင်းမှူးဗိုလ်ချုပ် အောင်ဇော်ထွေးနှင့် ဇနီး၊ တပ်မတော်အရာရှိကြီးများနှင့် ၎င်းတို့၏ ဇနီးများ၊ ပြည်သူ့စစ်ခေါင်းဆောင်များ၊ အထူးဖိတ်ကြားထားသော ဧည့်သည်တော်များနှင့်အတူ တိုင်းစစ်ဌာနချုပ် မြစ်ဖျားဧရာတီးဝိုင်းနှင့် တေးသီချင်းအကအလှများ ဖျော်ဖြေတင်ဆက်မှုကို ကြည့်ရှုအားပေးခဲ့ကြပြီး ဂုဏ်ပြုညစာကို အတူတကွ ရင်းနှီးစွာသုံးဆောင်ခဲ့ကြကြောင်း သိရသည်။
