မြစ်ကြီးနား မတ် ၂၉
မြန်မာသက္ကရာဇ် ၁၃၈၇ ခုနှစ်၊ မြန်မာနှစ်သစ်ကို ကြိုဆိုသောအားဖြင့် ကချင်ပြည်နယ်အစိုးရ ကကြီးမှူး၍ ကချင်ပြည်နယ်၊ မြစ်ကြီးနားမြို့ စီတာပူရပ်ကွက် မနောကွင်းအတွင်း MSME ထုတ်ကုန် ပြပွဲ၊ ပြိုင်ပွဲနှင့် ဈေးရောင်းပွဲတော်ကို ဧပြီ ၁ ရက်နေ့မှ စတင်၍ (၃)ရက်ကြာ စည်ကားသိုက်မြိုက်စွာ ကျင်းပပြုလုပ်နိုင်ရေးအတွက် လုပ်ငန်းညှိနှိုင်းအစည်းအဝေးကို ယနေ့ နံနက် ၉ နာရီက ပြည်နယ်အစိုးရအဖွဲ့ရုံး မလိခခန်းမ၌ ကျင်းပပြုလုပ်ရာ ပြည်နယ်ဝန်ကြီးချုပ် ဦးခက်ထိန်နန် တက်ရောက် အမှာစကားပြောကြားသည်။
ထိုသို့ အမှာစကားပြောကြားရာတွင် ပြည်နယ်ဝန်ကြီးချုပ်က ပြည်နယ်အတွင်းရှိ MSME လုပ် ငန်းများ ပိုမိုဖွံ့ဖြိုးတိုးတက်စေရေး ဒေသတွင်း စိုက်ပျိုးမွေးမြူရေးထွက်ကုန်များ၊ တန်ဖိုးမြှင့်ထုတ်ကုန် များနှင့် MSME ထုတ်ကုန်များကို ပြည်သူများ ပိုမိုသိရှိပြီး အဖိုးနှုန်းသက်သာစွာဖြင့် ဝယ်ယူရရှိနိုင်ရေး၊ MSME လုပ်ငန်းရှင်အချင်းချင်း ပူးပေါင်းဆောင်ရွက်မှု တိုးတက်လာစေရေး၊ ထုတ်ကုန်အမယ်သစ်များ တိုးတက်ထုတ်လုပ်ကာ သွင်းကုန်အစားထိုး ပိုမိုသုံးစွဲနိုင်ရန်နှင့် ဈေးကွက်မြှင့်တင်ပေးနိုင်ရန် မိမိတို့ အနေဖြင့် MSME ထုတ်ကုန်ပြပွဲနှင့် ဈေးရောင်းပွဲတော်ကို အောင်မြင်စွာကျင်းပနိုင်ရေး စနစ်တကျ စီမံဆောင်ရွက်သွားကြရန် အလေးအနက်တိုက်တွန်းလိုပါကြောင်းမှာကြားသည်။
ဆက်လက်၍ ပြည်နယ်စီးပွားရေးရာဝန်ကြီး ဦးမျိုးဆွေက MSME ပြပွဲ၊ ပြိုင်ပွဲနှင့် ဈေးရောင်းပွဲတော်ကျင်းပပြုလုပ်ရခြင်း၏ ရည်ရွယ်ချက်များနှင့် ဦးစီးကော်မတီနှင့် ဆပ်ကော်မတီများ ဖွဲ့စည်းထားရှိမှုနှင့်လုပ်ငန်းတာဝန်များကိုရှင်းလင်းတင်ပြပြီး ပြည်နယ်စက်မှုကြီးကြပ်ရေးဦးစီးဌာန ပြည်နယ်ဦးစီးမှူး ဦးအောင်သူက ပွဲတော်ကျင်းပပြုလုပ်သွားမည့် အသေးစိတ်အစီအမံများ၊ ပြပွဲဆိုင်ခန်းများနေရာချထားမှုနှင့် ပါဝင်ပြသသွားမည့် ထုတ်ကုန်ပစ္စည်းများ၊ ပေါင်းစပ်ဆောင်ရွက်ပေးရမည့် ကိစ္စရပ် များကို ရှင်းလင်းတင်ပြပြီး ဆပ်ကော်မတီအလိုက် တာဝန်ရှိသူများက ပွဲတော်အောင်မြင်စွာကျင်းပပြုလုပ်နိုင်ရေး ကဏ္ဍအလိုက် ကြိုတင်ပြင်ဆင်ဆောင်ရွက်ထားရှိမှုများနှင့် ဖွင့်ပွဲကျင်းပပြုလုပ်နိုင်ရေး ပြခန်းများ ဆုချီးမြှင့်နိုင်ရေးနှင့် လုံခြုံရေးဆိုင်ရာအစီအမံများကို ကဏ္ဍအလိုက် အသီးသီးရှင်းလင်း တင်ပြကြသည်။
တင်ပြဆွေးနွေးမှုများအပေါ် ပြည်နယ်ဝန်ကြီးချုပ်က ပွဲတော်အတွင်း ဒေသထွက်ကုန် ပစ္စည်း များ ပိုမိုစုံလွင်စွာ ပြသရောင်းချနိုင်ရေး၊ အများပြည်သူ ဘေးကင်းလုံခြုံစွာ ပါဝင်ဆင်နွှဲနိုင်ရေးနှင့် ရည်ရွယ်ချက်၊ ရည်မှန်းချက်နှင့်အညီ ဖြစ်မြောက်အောင်မြင်အောင် စီမံဆောင်ရွက်ရေးနှင့် လိုအပ် သည်များကို ပေါင်းစပ်ညှိနှိုင်းဆောင်ရွက်ပေးခဲ့သည်။
ယင်းနောက် အဆိုပါ အစည်းအဝေးခန်းမ၌ နိုင်ငံ့စီးပွားမြှင့်တင်ရေး ရန်ပုံငွေဖြင့် ဆောင်ရွက် သည့် ကချင်ပြည်နယ်အဆင့် ကျေးရွာစီမံကိန်းကြီးကြပ်မှုကော်မတီ၏ လုပ်ငန်းညှိနှိုင်းအစည်းအဝေး ကို ပြည်နယ်/ ခရိုင်/ မြို့နယ်ကြီးကြပ်မှုကော်မတီအဖွဲ့ဝင်နှင့် ခါကာဘိုရာဇီခန်းမ၌ ကျင်းပပြုလုပ်သည်။
အဆိုပါ လုပ်ငန်းညှိနှိုင်းအစည်းအဝေးတွင် ပြည်နယ်ဝန်ကြီးချုပ်က ယနေ့ အစည်းအဝေးတွင် ပြည်နယ်အတွင်းရှိ နိုင်ငံ့စီးပွားမြှင့်တင်ရေး မတည်ရန်ပုံငွေ (ဒုတိယနှစ်စက်ဝန်း)အတွက် ထုတ်ချေးပြီးစီးမှုအပေါ် လက်စွဲစာစောင်ပါ လုပ်ထုံး လုပ်နည်းများနှင့်အညီဖြစ်စေရေး၊ ထို့အပြင် နိုင်ငံ့စီးပွားရင်းနှီးမတည်ငွေရယူထားပြီး နယ်မြေလုံခြုံရေးအရ တိမ်းရှောင်နေရသည့် တောင်သူများ အတိုးငွေပေးသွင်းရန် အခက်အခဲဖြစ်ပေါ်ပါက အချိန်နှင့်တစ်ပြေးညီ အမြန်ဆုံးစိစစ် တင်ပြပေးကြရန် အလေး အနက်ထား တိုက်တွန်းလိုပါကြောင်း၊ ထို့အတူ ရန်ပုံငွေများခွင့်ပြုခွဲဝေချထားခြင်းအတွက် ငွေကြေးသုံးစွဲမှု၊ စာရင်းရှင်းတမ်းများကို စနစ်တကျပြုစုထားရှိရန်နှင့် စာရင်းစစ်ကန့်ကွက်ချက် မရှိစေရေး မှန်မှန်ကန်ကန်ဆောင်ရွက်ထားရှိရန်နှင့် ရန်ပုံငွေများကို အရှိန်အဟုန်မပျက်ဆက်လက်ရင်းနှီးမတည် ပေးနိုင်ရေး ဆွေးနွေးဆောင်ရွက်သွားရမည်ဖြစ်ကြောင်း တိုက်တွန်းမှာကြားသည်။
ထို့နောက် ကော်မတီအတွင်းရေးမှူး၊ ကျေးလက်ဒေသဖွံ့ဖြိုးတိုးတက်ရေးဦးစီးဌာန၊ ပြည်နယ် ဦးစီးမှူးဦးရဲမင်းကျော်က ဒုတိယနှစ်စက်ဝန်း ရန်ပုံငွေဖြင့် ခွဲဝေချပေးထားသည့် လုပ်ငန်းစီမံကိန်းများ၊ ပထမနှစ်စက်ဝန်းတွင် ကျန်ရှိသည့် အတိုးငွေလက်ခံရရှိမှု၊ ဒုတိယနှစ်စက်ဝန်းမှ အတိုးငွေပြန်လည်ရ ရှိမှုအပေါ် မြို့နယ်များမှ တင်ပြလာသည့် လုပ်ငန်းစီမံကိန်းအသစ်များအပေါ် ပြည်နယ်ကော်မတီမှ စီမံခန့်ခွဲနိုင်သည့် ရန်ပုံငွေအခြေအနေများကို ရှင်းလင်းတင်ပြသည်။
ဆက်လက်၍ သက်ဆိုင်ရာကဏ္ဍအလိုက် ဌာနဆိုင်ရာတာဝန်ရှိသူများနှင့် ဗီဒီယိုကွန်ဖရန့်ဖြင့် တက်ရောက်လာကြသည့် ခရိုင်/ မြို့နယ်ကြီးကြပ်မှုကော်မတီအဖွဲ့ဝင်များက စိုက်ပျိုးမွေးမြူရေးနှင့် ကုန်ထုတ်လုပ်မှုလုပ်ငန်းများအတွက် သက်ဆိုင်ရာကဏ္ဍအလိုက် ဒုတိယနှစ်စက်ဝန်းဖြင့် ရန်ပုံငွေခွဲဝေချထားပေးမှု၊ အတိုးငွေပြန်လည်ရရှိမှု အခြေအနေများနှင့် မြို့နယ်များအလိုက် ထပ်မံတင်ပြ တောင်းခံလာသည့် ရန်ပုံငွေလိုအပ်ချက်များကို အသီးသိးတင်ပြဆွေးနွေးကြရာ ပြည်နယ်ဝန်ကြီးချုပ် က ကဏ္ဍအလိုက် တင်ပြချက်များအပေါ် ချေးငွေများ ထပ်မံရင်းနှီးမတည်ပေးနိုင်ရေး ဌာနဆိုင်ရာတာဝန်ရှိသူများ၊ ခရိုင်ကြီးကြပ်မှုကော်မတီအဖွဲ့ဝင်များ ညှိနှိုင်းပေါင်းစပ်ဆောင်ရွက်ပေးခဲ့သည်။
ထို့အတူ ပြည်နယ်ဝန်ကြီးချုပ်သည် ယမန်နေ့ ညနေပိုင်းကလည်း ငြိမ်းချမ်းသာယာအားက စားရပ်ဝန်းအတွင်းရှိ ငြိမ်းချမ်းသာယာပိုက်ကျော်ခြင်းအားကစားရုံ၌ နှစ်(၈၀)ပြည့် တပ်မတော်နေ့ကို ဂုဏ်ပြုသောအားဖြင့် ကျင်းပပြုလုပ်ခဲ့သည့် ၂၀၂၅ ခုနှစ်၊ ပြည်နယ်ဝန်ကြီးချုပ်ဖလား အမျိုးသား(၃) ယောက်တွဲ ပိုက်ကျော်ခြင်းပြိုင်ပွဲ ဆုချီးမြှင့်ပွဲအခမ်းအနားသို့ တက်ရောက်သည်။
ရှေးဦးစွာ ပြည်နယ်ဝန်ကြီးချုပ်သည် ပြည်နယ်တရားလွှတ်တော်တရားသူကြီးချုပ်၊ ပြည်နယ်ဝန်ကြီးများ၊ ပြည်နယ်အဆင့်ဌာနဆိုင်ရာများနှင့်အတူ နောက်ဆုံးဗိုလ်လုပွဲစဉ်အဖြစ် အိုလံပစ်အသင်းနှင့် နောင်တာလောအသင်းတို့၏ ယှဉ်ပြိုင်ကစားမှုကို ကြည့်ရှုအားပေးခဲ့ရာ အိုလံပစ်အသင်းက အနိုင်ရဗိုလ်စွဲသည်။
ယင်းနောက် ဆုချီးမြှင့်ပွဲ အခမ်းအနားကို ဆက်လက်ကျင်းပရာ ပြည်နယ်အစိုးရအဖွဲ့ဝင် ဝန်ကြီးများက ပွဲစဉ်တစ်လျှောက် ရိုက်ခုတ်၊ ပင့်ထောင်၊ နောက်ထိန်းစသည့်နေရာအလိုက် အကောင်းဆုံး ကစားသမားဆုနှင့် အကောင်းဆုံးဆုရရှိသူများအား လည်းကောင်း၊ စတုတ္ထဆုရရှိသော အသင်းနှင့် တတိယဆုရရှိသော အသင်းများအားလည်းကောင်း တစ်ဦးချင်းလည်ဆွဲဆုနှင့် ငွေသားဆု များကို အသီးသီးပေးအပ်ချီးမြှင့်ခဲ့ကြသည်။
ဆက်လက်၍ ပြည်နယ်တရားလွှတ်တော်တရားသူကြီးချုပ်က ဒုတိယဆုရရှိသော အသင်းအားလည်းကောင်း၊ ပြည်နယ်ဝန်ကြီးချူပ်က ပထမဆုရရှိသောအသင်းအားလည်းကောင်း တစ်ဦးချင်းလည်ဆွဲဆုနှင့် ငွေသားဆုနှင့် တံခွန်စိုက်ဒိုင်းဆုများကို ပေးအပ်ချီးမြှင့်ခဲ့ကြသည်။
ထိုမှတစ်ဆင့် ပြည်နယ်ဝန်ကြီးချုပ်သည် တာဝန်ရှိသူများနှင့်အတူ မော်ဖောင်းကျေးရွာအုပ်စု၊ ငအိုးကျေးရွာအတွင်း နိုင်ငံ့စီးပွားမြှင့်တင်ရေး ရန်ပုံငွေ ရင်းနှီးမတည်ပေးမှုဖြင့် အကျိုးဖြစ်ထွန်းအောင် မြင်လျက်ရှိသော တောင်သူ ဦးဆင်ဝါးနော်၏ မွေးမြူရေးခြံသို့ သွားရောက်ပြီး ခြံဝင်းအတွင်း အသား တိုးဝက်များ မွေးမြူထားရှိမှု အခြေအနေများကို လည်းကောင်း၊ လုပ်ငန်းတိုးချဲ့ဆောင်ရွက်သည့် အနေဖြင့် ကြက်ခြံ (၃)တည်ဆောက်ထားပြီး အသားစားကြက်ပေါက်ကောင်ရေ ၃၀၀၀ ထပ်မံတိုးချဲ့ မွေးမြူလျက်ရှိသည့် အခြေအနေများကို လှည့်လည်ကြည့်ရှုစစ်ဆေးခဲ့ကြပြီး တောင်သူများအတွက် ချီးမြှင့်ငွေများကို ပေးအပ်ချီးမြှင့်ခဲ့ကြကြောင်း သိရသည်။
