မြစ်ကြီးနား မေ ၁၁
မြန်မာသက္ကရာဇ် ၁၃၈၇ ခုနှစ်၊ သာသနာနှစ် ၂၅၆၉ ခုနှစ် ကဆုန်လပြည့် (ဗုဒ္ဓနေ့) အခါသမယ တွင် ကချင်ပြည်နယ်၊ မြစ်ကြီးနားမြို့ရှိ ရှေးဟောင်းသမိုင်းဝင် လောကမာရ်အောင်စေတီတော်မြတ်ကြီး၌ ကချင်ပြည်နယ်အစိုးရအဖွဲ့ကကြီးမှူး၍ ကဆုန်လပြည့် (ဗုဒ္ဓနေ့) အခမ်းအနားနှင့် မဟာဗောဓိညောင်ပင်တော်ကြီးအား ကဆုန်ညောင်ရေသွန်းလောင်းပူဇော်ပွဲ အခမ်းအနားကို မေ ၁၁ ရက် နံနက် ၈ နာရီက စည်ကားသိုက်မြိုက်စွာ ကျင်းပပြုလုပ်သည်။
ရှေးဦးစွာ ကဆုန်လပြည့် (ဗုဒ္ဓနေ့)အခမ်းအနားကို စေတီတော်ပုရဝုဏ်၌ ကျင်းပပြုလုပ်ရာ အခမ်းအနားကို နမောတဿ သုံးကြိမ်ရွတ်ဆို ဘုရားကန်တော့ဖွင့်လှစ်ခဲ့ကြပြီး အောင်နန်းမဟာစည် သာသနာရိပ်သာကျောင်းတိုက်ဆရာတော် အဂ္ဂမဟာကမ္မဌာနစရိယ ဘဒ္ဒန္တအာဒိစ္စဝံသအမှူးပြုသော ဆရာတော်ရှင်သူမြတ်များထံမှ ကိုးပါးသီလ ခံယူဆောက်တည်ကြကာ ပြည်နယ်သံဃာနာယက အကျိုးဆောင်၊ ဝန်းသိုကျောင်းတိုက်ဆရာတော်ထံမှ ဗုဒ္ဓနေ့နှင့် ကဆုန်ညောင်ရေသွန်းပွဲနှင့်စပ်လျဉ်း ၍ သြဝါဒအနုမောဒနာတရားတော်များ နာယူခဲ့ကြသည်။
ဆက်လက်၍ ပြည်နယ်လူမှုရေးရာဝန်ကြီး ဦးမိုးမင်းသိန်းက သာသနာရေးဆိုင်ရာများနှင့်စပ်လျဉ်း၍ လျှောက်ထားတင်ပြပြီး ဝတ်အသင်းအဖွဲ့များက ကဆုန်လပြည့်ဗုဒ္ဓနေ့ ရှစ်လုံးဘွဲ့ကဗျာကို ညီညာစွာရွတ်ဖတ်ပူဇော်ကြကြပြီး ပြည်နယ်ဝန်ကြီးချုပ်နှင့် ဇနီးဒေါ်နန်ဆိုင်း၊ တာဝန်ရှိသူများက ဆရာတော်/ သံဃာတော်များထံ လှူဖွယ်ပစ္စည်းများ ဆက်ကပ်လှူဒါန်းကြပြီး လှူဒါန်းမှုအစုစုတို့ အတွက် ရေစက်သွန်းချအမျှပေးဝေခဲ့ကြသည်။
ထို့နောက် စေတီတော်ပုရဝုဏ်အတွင်းရှိ မဟာဗောဓိညောင်ပင်၌ ညောင်ရေသွန်းပွဲကို ဆက်လက်ကျင်းပပြုလုပ်ရာ ပြည်နယ်ဝန်ကြီးချုပ်နှင့်ဇနီး၊ ပြည်နယ်တရားလွှတ်တော်တရားသူကြီးချုပ်၊ ပြည်နယ်အစိုးရအဖွဲ့ဝင်များနှင့် ၎င်းတို့၏ ဇနီးများ၊ ပြည်နယ်/ ခရိုင်/ မြို့နယ်အဆင့်ဌာနဆိုင်ရာများ၊ ဝတ်အသင်းအဖွဲ့များ၊ ဒေသခံပြည်သူများက ဒိုးပတ်တီးဝိုင်းတို့ဖြင့် ညောင်ရေသွန်းလောင်းပူဇော်ခဲ့ကြပြီး အခမ်းအနားကို ဗုဒ္ဓသာသနံစိရံတိဋ္ဌတု သုံးကြိမ်ရွတ်ဆို ဘုရားကန်တော့ ဆုတောင်း၍ အခမ်းအနားကို ရုပ်သိမ်းလိုက်ကြကာ ညောင်ရေသွန်းလောင်းပွဲသို့ တက်ရောက်လာကြသော ဧည့်ပရိတ် သတ်များအား ပြည်နယ်ဝန်ကြီးချုပ်နှင့် ဇနီးတို့က စတုဒိသာဖြင့် ဧည့်ခံကျွေးမွေးခဲ့ကြကြောင်း သိရသည်။
