မြစ်ကြီးနား မတ် ၂၀
နှစ် (၈၀)ပြည့် တပ်မတော်နေ့ကို ကြိုဆိုဂုဏ်ပြုသောအားဖြင့် မြစ်ကြီးနားမြို့ အမှတ် (၁) တပ်မတော်ဆေးရုံ (ကုတင်-၃၀၀) နှင့် ဆမားဒူဝါဆင်ဝါးနော်ခန်းမတို့၌ တပ်မတော်သားများ၊ ဌာနဆိုင်ရာအဖွဲ့အစည်းများမှ အရာထမ်း/အမှုထမ်းများ စုပေါင်းသွေးလှူဒါန်းပွဲများကို မတ် ၂၀ ရက် နံနက် ၈ နာရီက ကျင်းပပြုလုပ်ရာ ပြည်နယ်ဝန်ကြီးချုပ်၊ တိုင်းမှူးနှင့်တာဝန်ရှိသူများက သွားရောက်ကြည့်ရှု အားပေးခဲ့ကြသည်။
ရှေးဦးစွာ ပြည်နယ်ဝန်ကြီးချုပ်သည် ပြည်နယ်တရားလွှတ်တော်တရားသူကြီးချုပ်၊ ပြည်နယ်အစိုးရအဖွဲ့ဝင်များနှင့်အတူ မြစ်ကြီးနားမြို့ အမှတ် (၁) တပ်မတော်ဆေးရုံ (ကုတင်-၃၀၀)သို့ သွားရောက်ခဲ့ကြပြီး မြောက်ပိုင်းတိုင်းစစ်ဌာနချုပ် တိုင်းမှူးဗိုလ်ချုပ်အောင်ဇော်ထွေး၊ ဒုတိယတိုင်းမှူး၊ တပ်မတော်အရာရှိကြီးများနှင့် ဆေးကုသဆောင် (၁)အတွင်း ဆေးတပ်မှူးနှင့် ဝန်ထမ်းများ၏ အကူအညီဖြင့် အရာရှိစစ်သည်များနှင့် စစ်သည်မိသားစုများက နှစ် (၈၀)ပြည့် တပ်မတော်နေ့ အထိမ်း အမှတ် စုပေါင်းသွေးလှူဒါန်းနေမှုကို လှည့်လည်ကြည့်ရှုအားပေးခဲ့ကြကာ သွေးလှူဒါန်းသူများအတွက် အဟာဖြည့်စားသောက်ဖွယ်ရာများနှင့် လက်ဆောင်များကို အသီးသီးပေးအပ်ချီးမြှင့်ခဲ့ကြပြီး ပြည်နယ်ဝန်ကြီးချုပ်က ဆေးရုံဝန်ထမ်းများအတွက် ချီးမြှင့်ငွေများကို ပေးအပ်ချီးမြှင့်ခဲ့ကြသည်။
ထို့နောက် ပြည်နယ်ဝန်ကြီးချုပ်၊ တိုင်းမှူးနှင့်တာဝန်ရှိသူများသည် ပြည်နယ်အစိုးရအဖွဲ့ ရုံးဝင်းအတွင်းရှိ ဆမားဒူဝါဆင်ဝါးနော်ခန်းမ၌ နှစ် (၈၀)ပြည့် တပ်မတော်နေ့အား ကြိုဆိုဂုဏ်ပြုသောအားဖြင့် အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ အထူးစုံစမ်းစစ်ဆေးရေးဦးစီးဌာန၊ အကျဉ်းဦးစီးဌာန၊ မီးသတ်ဦးစီးဌာနများမှ အရာထမ်း/ အမှုထမ်းများက မြစ်ကြီးနားပြည်သူ့ဆေးရုံကြီး သွေးလှူဘဏ်ဌာနမှ ကျန်းမာရေးဝန်ထမ်များ၏ အကူအညီဖြင့် စုပေါင်းသွေးလှူဒါန်းနေမှုများကို လှည့်လည်ကြည့်ရှုအားပေးခဲ့ကြပြီး သွေးလှူရှင်များအတွက် အာဟာရဖြည့် စားသောက်ဖွယ်ရာများကိုလည်းကောင်း၊ ပြည်နယ်ဝန်ကြီးချုပ်က ကျန်းမာရေးဝန်ထမ်းများအတွက် ချီးမြှင့်ငွေများကိုလည်းကောင်း အသီးသီးပေးအပ်ချီးမြှင့်ခဲ့ကြသည်။
ယင်းနောက် ပြည်နယ်ဝန်ကြီးချုပ်နှင့်အဖွဲ့ဝင်များသည် မြစ်ကြီးနားမြို့ အောင်နန်းရပ်ကွက် အတွင်းရှိ အမှတ် (၃)အခြေခံ ပညာအထက်တန်းကျောင်း၌ စာစစ်ဌာနဖွင့်လှစ်၍ တက္ကသိုလ်ဝင်စာမေးပွဲ စတုတ္ထနေ့အဖြစ် အေးချမ်းတည်ငြိမ်စွာဖြင့် ဖြေဆိုနေမှုကို လှည့်လည်ကြည့်ရှုစစ်ဆေးခဲ့ကြပြီး စာမေးပွဲကြီးကြပ်ရေးအဖွဲ့ဝင် ဌာနဆိုင်ရာများနှင့် ကျန်းမာရေးဝန်ထမ်းများအား ရင်းရင်းနှီးနှီးနှုတ်ဆက်အားပေးကာ ကျောင်းသား/ ကျောင်းသူများ စာမေးပွဲဖြေဆို စဉ်ကာလအတွင်း အနှောင့်အယှက် တစ်စုံတစ်ရာမရှိစေရန် အလေးထားဆောင်ရွက်ကြရေးနှင့် လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ကာ စာမေးပွဲဖြေဆိုပြီး ပြန်လည်ထွက်ခွာလာ ကြသည့်ကျောင်းသား/ကျောင်းသူများအားပြည်နယ်အမျိုးသမီးရေးရာအဖွဲ့ဝင်များနှင့်အတူ အာဟာရအဖြစ်မုန့်နှင့်ဖျော်ရေများကို ဝေငှကျွေးမွေးပေးခဲ့ကြသည်။
ထို့အပြင် ပြည်နယ်ဝန်ကြီးချုပ်သည် ပြည်နယ်အစိုးရအဖွဲ့ဝင် ဝန်ကြီးများ၊ ဌာနဆိုင်ရာတာဝန်ရှိသူများနှင့် မြစ်ကြီးနားမြို့ ဧရာရပ်ကွက်အတွင်း ပြည်နယ်အစိုးရအဖွဲ့ ငွေလုံးငွေရင်းရန်ပုံငွေကျပ် (၉၉၈) သန်းဖြင့် (၁၈၅ ပေ၊ ၁၂၄ ပေ)ရှိ မြို့တော်ခန်းမသစ်တည်ဆောက်နေမှုနှင့် စပ်လျဉ်း၍ လုပ်ငန်းဆောင်ရွက် ပြီးစီးမှုအခြေအနေများကို သွားရောက်ကြည့်ရှုစစ်ဆေးခဲ့ကြရာ ရှင်းလင်းဆောင် ၌ ပြည်နယ်ဝန်ကြီးချုပ်က မြို့တော်ခန်းမ၌ ခေတ်မီဖွံ့ဖြိုးတိုးတက်လာသည့် မြို့ပြအင်္ဂါရပ်နှင့် လိုက်ဖက်စေရေးအတွက် ယခင်ခန်းမအဟောင်းအား ဖျက်သိမ်း၍ ခေတ်မီသစ်လွင်သည့် မြို့ကျက်သရေဆောင်ခန်းမသစ်ကို တည်ဆောက်ရာတွင် သတ်မှတ်ဘဏ္ဍာနှစ်အတွင်း အရည်အသွေးပြည့်မီစွာပြီးစီးအောင်ဆောင်ရွက်ရေး တိုက်တွန်းမှာကြားသည်။
ထို့နောက် မြို့တော်ခန်းမသစ်အား တာဝန်ယူတည်ဆောက်လျက်ရှိသည့် Jade Land Myanmar ကုမ္ပဏီမှ ဒါရိုက်တာနှင့် တာဝန်ခံအင်ဂျင်နီယာတို့က မြို့တော်ခန်းမ၌ တည်ဆောက်ခြင်းလုပ်ငန်းနှင့် စပ်လျဉ်း၍ ၂၀၂၄-၂၀၂၅ ဘဏ္ဍာနှစ်အတွင်း ဆောင်ရွက်ပြီးစီးရမည့် လုပ်ငန်းဆောင်ရွက်ပြီးစီးမှု၊ ဆောင်ရွက်ဆဲအခြေအနေများအား ရှင်းလင်းတင်ပြပြီး ပြည်နယ်ဝန်ကြီးချုပ်က မြို့တော်ခန်းမသစ် အဆောက်အအုံတည်ဆောက်နေမှုအခြေအနေများအား လှည့်လည်ကြည့်ရှုစစ်ဆေးခဲ့ကြပြီး လိုအပ် သည်များကို ဌာနဆိုင်ရာတာဝန်ရှိသူများနှင့် ပေါင်းစပ်ညှိနှိုင်းဆောင်ရွက်ပေးခဲ့သည်။
ထို့အတူ ညနေပိုင်းတွင်လည်း ပြည်နယ်ဝန်ကြီးချုပ်သည် ပြည်နယ်ဝန်ကြီးများ၊ ဌာနဆိုင်ရာတာဝန်ရှိသူများနှင့်အတူ ဝိုင်းမော်မြို့နယ် နောင်တာလောကျေးရွာ၊ နယ်မြေ (၄)အတွင်းရှိ မဒိန် နှစ်ခြင်းအသင်းတော်ဘုရားကျောင်း၌ ပြည်နယ်အတွင်း အကြမ်းဖက်မှုဖြစ်စဉ်များကြောင့် နေရပ်စွန့် ခွာတိမ်းရှောင်၍ လာရောက်ခိုလှုံနေထိုင်ကြသော အိမ်ထောင်စုများနှင့် ရင်းရင်းနှီးနှီးသွားရောက်တွေ့ ဆုံအားပေးစကားပြောကြားပြီး အိမ်ထောင်စုများ လတ်တလောနေထိုင်စားသောက်မှု အဆင်ပြေစေရေးလိုအပ်ချက်များကို မေးမြန်းဆွေးနွေးကာ လိုအပ်ချက်များကို ဌာနဆိုင်ရာတာဝန်ရှိသူများနှင့် ညှိနှိုင်းပေါင်းစပ်ဆောင်ရွက်ပေးခဲ့ပြီး အိမ်ထောင်စုများအတွက် ဆန်၊ ဆီနှင့် အခြေခံစားသောက်ကုန်များ ထောက်ပံ့ပေးနိုင်ရေးနှင့် အိမ်ထောင်စုများအတွက် ဟင်းသီးဟင်းရွက်မျိုးစေ့များကို ပေးအပ်ခဲ့ကြသည်။
ဆက်လက်၍ အဆိုပါဝင်းအတွင်း အိမ်ထောင်စုများအတွက် အဆောင်သစ်များတိုးချဲ့ဆောက်လုပ်ပေးနိုင်ရေး လျာထားသည့် မြေနေရာအား လှည့်လည်ကြည့်ရှုစစ်ဆေးပြီး မိုးမကျမီး အမိုးအကာလုံခြုံစွာဖြင့်နေထိုင်နိုင်ရေး ညှိနှိုင်းပေါင်းစပ်ဆောင်ရွက်ပေးခဲ့သည်။
အလားတူ မိုင်းနားကျေးရွာအတွင်းရှိ ကက်သလစ်အသင်းတော်ပိုင်ဝင်းအတွင်း ယာယီခိုလှုံနေထိုင်လျက်ရှိသော အိမ်ထောင်စုများနှင့် သွားရောက်တွေ့ဆုံအားပေးပြီး အိမ်ထောင်စုများ၏ လိုအပ်ချက်များကို မေးမြန်းဆွေးနွေးကာ လိုအပ်ချက်များကို ဌာနဆိုင်ရာတာဝန်ရှိသူများနှင့် ပေါင်းစပ်ညှိနှိုင်း၍ ဖြည့်ဆည်းဆောင်ရွက်ပေးခဲ့ကာ အိမ်ထောင်စုများအတွက် ဆန်အိတ် (၆၅)အိတ်၊ ဆီ (၆၅)ပိဿာ၊ ကြက်ဥ (၆၅)ကတ် နှင့် Grade -12 စာမေးပွဲဖြေဆိုလျက်ရှိသည့် ကျောင်းသား/ကျောင်းသူ ၂၀ ဦးတို့အတွက် ငွေကျပ် သိန်း(၂၀)၊ ဆေးတက္ကသိုလ်တက်ရောက်နေသည့် ကျောင်းသား အတွက် ငွေကျပ် (၁၀) သိန်း တို့ကို အသီးသီးပေးအပ်ခဲ့ကြသည်။
ထို့နောက် အဆိုပါဝင်းအတွင်း အိမ်ထောင်စုများနေထိုင်ရာ အဆောက်အအုံများအား လှည့်လည်ကြည့်ရှုစစ်ဆေးပြီး မိုးမကျမီ ပြင်ဆင်ဆောင်ရွက်ပေးနိုင်ရေး တာဝန်ရှိသူများနှင့် ပေါင်းစပ်ဆောင်ရွက်ပေးခဲ့ကြောင်း သိရသည်။
