မြစ်ကြီးနား မတ် ၂၇
နှစ်(၈၀)ပြည့် တပ်မတော်နေ့ စစ်ရေးပြအခမ်းအနားကို ကချင်ပြည်နယ်၊ မြစ်ကြီးနားမြို့ မြောက်ပိုင်းတိုင်းစစ်ဌာနချုပ်၌ မတ် ၂၇ ရက် နံနက် ၇ နာရီက တိုင်းစစ်ဌာနချုပ်အားကစားကွင်း၌ ကျင်းပပြုလုပ်ရာ ရှေးဦးစွာ စစ်ရေးပြမှူးနှင့်စစ်ရေးပြတပ်ခွဲများက စစ်ကြောင်းပုံဖြင့် ချီတက်၍ စစ်ရေးပြအစီအစဉ်များအတိုင်း ဆောင်ရွက်ခဲ့ကြသည်။
ထို့နောက် ပြည်နယ်ဝန်ကြီးချုပ် ဦးခက်ထိန်နန်၊ မြောက်ပိုင်းတိုင်းစစ်ဌာနချုပ်တိုင်းမှူး ဗိုလ်ချုပ် အောင်ဇော်ထွေးနှင့် တိုင်းစစ်ဌာချုပ်မှ တပ်မတော်အရာရှိကြီးများ၊ ပြည်နယ်အစိုးရအဖွဲ့ဝင် ဝန်ကြီးများ၊ တပ်နယ်များမှ တပ်ရင်း/ တပ်ဖွဲ့မှူးများ၊ အရာရှိစစ်သည်မိသားစုဝင်များ၊ စစ်မှုထမ်း ဟောင်းအဖွဲ့ဝင်များ၊ ပြည်သူ့စစ်အဖွဲ့ဝင်များနှင့် ဖိတ်ကြားထားသော ဧည့်သည်တော်များက နိုင်ငံတော်အလံနှင့် ကျဆုံးလေပြီးသော တပ်မတော်သားများအား အလေးပြုကြသည်။
ဆက်လက်၍ တိုင်းမှူးက တပ်မတော်နေ့ မိန့်ခွန်းပြောကြားပြီး ပြည်နယ်ဝန်ကြီးချုပ်၊ တိုင်းမှူး နှင့် တာဝန်ရှိသူများက တက်ရောက်လာကြသည့် တပ်မတော်အရာရှိစစ်သည် မိသားစုများနှင့် ဖိတ်ကြားထားသောဧည့်သည်တော်များအား ရင်းရင်းနှီးနှီး လိုက်လံနှုတ်ဆက်ခဲ့ကြသည်။
ထိုမှတစ်ဆင့် ပြည်နယ်ဝန်ကြီးချုပ်သည် မြစ်ကြီးနားမြို့ ဧရာဝတီမြစ်ရေကြီးမြင့်မှုမှ ကြိုတင်ကာကွယ်နိုင်ရေးအတွက် လုပ်ငန်းအစီအမံများအနက် ကြိုတင်ဆောင်ရွက်မည့် အစီအစဉ်တစ်ခုဖြစ် သည့် ဗလမင်းထင်တံတားအောက် သဲသောင်ခုံရှင်းလင်းရေးလုပ်ငန်းအား လုပ်ငန်းရှင်များ ဖိတ်ခေါ်၍ စတင်ဆောင်ရွက်သွားနိုင်ရေး ကွင်းဆင်းစစ်ဆေးခဲ့သည်။
ထိုသို့ ကွင်းဆင်းစစ်ဆေးရာတွင် ပြည်နယ်ဝန်ကြီးချုပ်သည် ပြည်နယ်ဝန်ကြီးများ၊ ပြည်နယ်အဆင့် ဌာနဆိုင်ရာတာဝန်ရှိသူများ၊ သဲကျောက်တူးဖော်ရေးလုပ်ငန်းရှင်များနှင့် သဲသောင်ခုံပေါ်ရှိ လုပ်ကွက်နေရာချထားပေးသည့် နေရာ၌ တွေ့ဆုံပြီး ပြည်နယ်ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေးဦးစီးဌာန၊ ပြည်နယ်ဦးစီးမှူး ဦးစိန်လွင်က သဲသောင်တူးဖော်ရှင်းလင်းနိုင်ရေးအတွက် လုပ်ကွက်များချထားပေးမှုအခြေအနေများနှင့် သဲကျောက်များအား တူးဖော်/ သယ်ယူ/ ရွေ့ပြောင်းနိုင်ရေး သတ်မှတ်စည်းမျဉ်းစည်းကမ်းများနှင့်အညီ ဆောင်ရွက်သွားရမည့် အစီအစဉ်များကို ရှင်းလင်းတင်ပြရာ သတ်မှတ်လုပ်ကွက်အတိုင်း အမြန်ဆုံးဆောင်ရွက်ပြီးစီးရေး၊ သဲကျောက်များ ရွှေ့ပြောင်းသယ်ယူရာတွင် ပတ်ဝန်းကျင်ထိခိုက်မှု မရှိစေရေး လုပ်ထုံးလုပ်နည်းနှင့်အတူ တာဝန်ယူ မှု/ တာဝန်ခံမှုဖြင့် ဆောင်ရွက်သွားရေး ပွင့်လင်းရင်းနှီးညှိနှိုင်းဆွေးနွေးခဲ့ကြပြီး ပြည်နယ်ဝန်ကြီးချုပ်က သတ်မှတ်စည်းမျဉ်းစည်းကမ်းနှင့်အညီ အမြန်ဆုံးတူးဖော်ရှင်းလင်းနိုင်ရေး၊ ဌာနဆိုင်ရာများက အနီးကပ်ကြီးကြပ်မှုဖြင့် ပေါင်းစပ်ဆောင်ရွက်နိုင်ရေး ညှိနှိုင်းဆောင်ရွက်ပေးခဲ့သည်။
အဆိုပါ သဲသောင်ပြင်အား မူလလျာထားသည့် အလျား ၆၀၀၀ ပေ အစား မြစ်ရေအတက်/အကျဖြစ်ပေါ်မှုအခြေအနေအရ အလျား ၅၀၀၀ ပေ၊ အကျယ် ၂၄၀ ပေအစား ၁၆၅ ပေအားအနက် ရေစစ်မျဉ်းအောက် ၂ မီတာ ပြည့်မီအောင် ဆောင်ရွက်သွားမည်ဖြစ်ကာ တူးဖော်ရှင်းလင်းရေးအတွက် ပြည်နယ်အစိုးရအဖွဲ့ အစီအစဉ်ဖြင့် သဲကျောက်တူးဖော်သည့် လုပ်ငန်းရှင်များအား ဖိတ်ခေါ်ကာ အဆိုပါ သဲသောင်ခုံတွင် လုပ်ကွက်ပေါင်း ၁၃ ခုချထားပေးကြောင်းနှင့် သဲကျောက်တူးဖော်ရှင်းလင်း ရေးအတွက် လုပ်ငန်းစည်းမျဉ်းစည်းကမ်းများ(SOP) အညီဆောင်ရွက်နိုင်ရေး ကြပ်မတ်ဆောင်ရွက် သွားမည်ဖြစ်ကြောင်း သိရသည်။
ထို့နောက် ပြည်နယ်ဝန်ကြီးချုပ်နှင့် အဖွဲ့ဝင်များသည် အဆိုပါ သောင်ခုံအတွင်း သဲကျောက် သယ်ယူမည့် ကားများအတွက် လမ်းဖောက်ထားရှိမှုအား ယာဉ်အန္တရာယ်ကင်းရှင်းရေးအတွက် နှစ်လမ်းသွားဖောက်လုပ် သယ်ယူနိုင်ရေး ကွင်းဆင်းစစ်ဆေးခဲ့ကြပြီး လုပ်ငန်းရှင်များနှင့်ညှိနှိုင်းပေါင်း စပ်ဆောင်ရွက်ပေးခဲ့ကာ ဗလမင်းထင်အမှတ် (၂)တံတား စီမံကိန်းရှင်းလင်းဆောင်၌ တံတားဦးစီး ဌာန တာဝန်ရှိသူများနှင့် အမှတ် (၂)တံတား စီမံကိန်းလုပ်ငန်းနှင့် စပ်လျဉ်း၍ ၂၀၂၄-၂၀၂၅ ဘဏ္ဍာနှစ် အတွက် တည်ဆောက်ပြီးစီးမှုအခြေအနေများကို လည်းကောင်းနှင့် တံတားဟောင်း ရေလယ်တိုင် အမှတ် (၅) ရေတိုက်စားမှုအပေါ် ရေတိုက်စားမှုနှင့် တိုင်အောက်ခြေ မြစ်ကြမ်းပြင် ထိန်းသိမ်းခြင်း လုပ်ငန်းအတွက် ဆောင်ရွက်ထားရှိမှု အခြေအနေများ၊ သဲသောင်ရှင်းလင်းပြီးစီးပါက ရေကြောင်းဖြောင့်တန်းပြီး ထိခိုက်မှုလျော့နည်းဆုံးဖြစ်နိုင်သည့် အခြေအနေများကို လည်းကောင်း၊ မိုးလေဝသနှင့် ဇလဗေဒဦးစီးဌာန၏ ခန့်မှန်းချက်များအရ ဧရာဝတီမြစ်အထက်ပိုင်း မိုးရွာနိုင်ခြေနှင့် လအလိုက် မြစ်ရေမြင့်တက်နိုင်ခြေရှိမှုအပေါ် သဲကျောက်တူးဖော်ခြင်းလုပ်ငန်း အမြန်ဆုံးပြီးစီးနိုင်ရေး ကြိုတင် တွက်ချက်ဆောင်ရွက်သွားရမည့် အစီအစဉ်များကို ညှိနှိုင်းဆွေးနွေးဆောင်ရွက်ခဲ့ကြသည်။
ယင်းနောက် ပြည်နယ်ဝန်ကြီးချုပ်နှင့် အဖွဲ့ဝင်များသည် စီတာပူရပ်ကွက်အတွင်းရှိ ဧရာဝတီရှုခင်းသာအပန်းဖြေစခန်းသို့ သွားရောက်ပြီး မြစ်ရေအနည်းငယ်မြင့်တက်မှုကြောင့် ရေနစ်မြှုပ်ခဲ့သည့် မြေဧရိယာအနေအထားနှင့် စီတာပူရပ်ကွက် ဝါးဆိပ်မှ မြစ်ကြောင်းတစ်လျှောက် သီတာရပ်ကွက်လောကမာန်အောင် ဆုတောင်းပြည့်စေတီတော် ဆိပ်ကမ်းအထိ သဲသောင်ခုံဧရိယာတွင် စိုက်ပျိုးထား သည့် နေကြာများ ရိတ်သိမ်းပြီး မြေဧရိယာရှင်းလင်းနိုင်ရေးနှင့် မြစ်ရေကျချိန်တွင် ထပ်မံစိုက်ပျိုးဆောင်ရွက်နိုင်ရေး လှည့်လည်ကြည့်ရှုစစ်ဆေးခဲ့ကြသည်။
ထို့အပြင် ယမန်နေ့ ညနေပိုင်းကလည်း ပြည်နယ်ဘောလုံးကွင််းအတွင်း နှစ်(၈၀)ပြည့် တပ်မတော်နေ့ကို ကြိုဆိုဂုဏ်ပြုသောအားဖြင့် ပြည်နယ်အားကစားနှင့်ကာယပညာဦးစီးဌာနနှင့် ကချင်ပြည်နယ်ဘောလုံးလက်ရွေးစင်ဟောင်းအဖွဲ့တို့ ပူးပေါင်း၍ ၂၀၂၅ ခုနှစ်၊ ပြည်နယ်ဝန်ကြီးချုပ် ဖလား အသက်(၁၈)နှစ်အောက် အမျိုးသားဘောလုံးပြိုင်ပွဲ ဖွင့်ပွဲ အခမ်းအနားကို ကျင်းပပြုလုပ် သည်။
အဆိုပါ ဘောလုံးပြိုင်ပွဲ ဖွင့်ပွဲအခမ်းအနားတွင် ပြည်နယ်ဝန်ကြီးချုပ်က ယနေ့ဘောလုံးပြိုင်ပွဲမှသည်လာမည့် ၂၀၂၅ ခုနှစ်၊ တိုင်းဒေသကြီးနှင့် ပြည်နယ်အသက် (၁၈)နှစ်အောက် ဘောလုံးပြိုင်ပွဲအတွက် လက်ရွေးစင်များ ရွေးချယ်ပြီး စခန်းသွင်းလေ့ကျင့်သွားမည်ဖြစ်ပါကြောင်း၊ ပြီးခဲ့သည့် ၂၀၂၄ ခုနျစ် အသက်၂၁ နှစ်အောက် ဘောလုံးပြိုင်ပွဲတွင် ပြည်နယ်လက်ရွေးစင်ဘောလုံးအသင်းအနေဖြင့် ပထမတံခွန်စိုက်ဒိုင်းဆုကို ဆွတ်ခူးရရှိနိုင်ခဲ့သည့် ချန်ပီယံအသင်းအဖြစ် ရပ်တည်နိုင်ခဲ့ပါကြောင်း၊ သို့ ဖြစ်ပါ၍ ပြည်နယ်၏ ဘောလုံးအားကစားအဆင့်အတန်း အရှိန်အဟုန်ဖြင့် တိုးတက်အောင်မြင်ရေး လူငယ်ကစားသမားများကို တာဝန်ရှိသူများအနေဖြင့် စဉ်ဆက်မပြတ်လေ့ကျင့်မွေးထုတ်ပေးကြရန် လိုအပ်ပါကြောင်းနှင့် ယနေ့ ဘောလုံးပြိုင်ပွဲအား ဖွင့်လှစ်ပေးကြောင်း ပြောကြားသည်။
ယင်းနောက် ပြည်နယ်ဝန်ကြီးချုပ်နှင့် တာဝန်ရှိသူများက ပြိုင်ပွဲဝင် ဘောလုံးအသင်း ၁၂ သင်း တို့၏ နည်းပြများနှင့်အားကစားသမားများအား ရင်းရင်းနှီးနှီး လိုက်လံနှုတ်ဆက်အားပေးခဲ့ကြကာ အဖွင့်ပွဲစဉ်အဖြစ် ဒူဒူးရှရော်အသင်းနှင့် လဝမ် FC အသင်းတို့၏ ယှဉ်ပြိုင်ကစားမှုကို ကြည့်ရှုအားပေးခဲ့ ကြသည်။
ထိုမှတစ်ဆင့် ပြည်နယ်ဝန်ကြီးချုပ်နှင့် အဖွဲ့ဝင်များသည် မန်ခိန်(ရွှေစက်)ရပ်ကွက်အတွင်းရှိ ကရိန်နော်အပန်းဖြေစခန်းအနီးရှိ ပိုင်ရှင် ဦးဒါရှီယောဘ မိသားစု၏ D-Home Land ခြံသို့ သွားရောက်ပြီး ၎င်းပိုင် မြေဧရိယာ ၃ ဧကကျော်ပေါ်တွင် မြစ်ကြီးနားမြို့နယ်အတွင်း ဧရာဝတီမြစ်ကမ်းဘေး၌ အပန်းဖြေစခန်းတစ်ခုအဖြစ် အကောင်အထည်ဖော်ဆောင်ရွက်သွားမည့် အစီအစဉ်များနှင့် စပ်လျဉ်း၍ ကြိုတင်ပြင်ဆင်ဆောင်ရွက်ထားရှိသည့် ဧရာဝတီမြစ်လယ်ရှိ သဘာဝအတိုင်းတည်ရှိသည့် ရေ လယ်ကျောက်ဆောင်များတွင် ပြင်ဆင်ဆောင်ရွက်သွားမည့် အစီအစဉ်များ၊ ခြံဝင်းအတွင်းအရိပ်ရ ပန်းပွင့်သည့် အပင်ကြီးများ၊ ဝါးပင်များ စိုက်ပျိုးသွားမည့် အစီအစဉ်များကို ခြံဝင်းအတွင်းဖြတ်သန်း စီးဆင်းသည့် ကဝါးခချောင်း အခြေအနေများကို လှည့်လည်ကြည့်ရှုစစ်ဆေးခဲ့ကြပြီး လိုအပ်သည့် နည်းပညာနှင့်ပံ့ပိုးကူညီမှုများ ဆောင်ရွက်ပေးနိုင်ရေး ဌာနဆိုင်ရာတာဝန်ရှိသူများနှင့် ပေါင်းစပ်ညှိနှိုင်း ဆောင်ရွက်ပေးခဲ့ကြောင်း သိရသည်။
