မြစ်ကြီးနား သြဂုတ် ၂၈
ကချင်ပြည်နယ်အစိုးရအဖွဲ့ ပြည်နယ်တိုင်းရင်းသားရေးရာဝန်ကြီးဌာနမှကြီးမှူး၍ ပြည်နယ်အားကစားနှင့်ကာယပညာဦးစီးဌာနနှင့် ပြည်နယ်ဘောလုံးအားကစားဆပ်ကော်မတီတို့ ပူးပေါင်းကျင်းမည့် တတိယအကြိမ်ပြည်နယ်တိုင်းရင်းသားရေးရာဝန်ကြီးဖလား မျိုးနွယ်စုပေါင်းစုံ အလွတ်တန်းအမျိုးသားဘောလုံးပြိုင်ပွဲ အောင်မြင်စွာကျင်းပပြုလုပ်နိုင်ရေးအတွက် ညှိနှိုင်းဆွေးနွေးပွဲကို သြဂုတ် ၂၈ နံနက် ၁၀ နာရီက ပြည်နယ်အားကစားနှင့်ကာယပညာဦးစီးဌာနရုံး၌ ကျင်းပပြုလုပ်သည်။
ညှိနှိုင်းအစည်းအဝေးတွင် ပြည်နယ်တိုင်းရင်းသားရေးရာဝန်ကြီး ဦးကျော်မင်းခိုင်က ပြည်နယ်အတွင်းရှိ တိုင်းရင်း သားမျိုးနွယ်စုများဖြစ်ကြသည့် ကချင်(၆)မျိုး၊ ရှမ်း(၅)မျိုး၊ ဗမာ(၁) မျိုးပါဝင်သည့် ဘောလုံးပြိုင်ပွဲကို မိမိတို့ တိုင်းရင်းသားအချင်းချင်း ပိုမိုချစ်ကြည်ရင်းနှီးမှု ပိုမိုခိုင်မြဲစေပြီး၊ တိုင်းရင်းသားလူငယ်များ ကျန်းမာကြံ့ခိုင်ပြီး စာပေနှင့်ယဉ်ကျေးမှုများကို မျိုးဆက်သစ်လူငယ်များ လက်ဆင့်ကမ်းထိန်းသိမ်းလာနိုင်ရေး ရည်ရွယ်ကာကျင်းပရခြင်းဖြစ်သည့်အတွက် လိုအပ်သည်များကို ဝိုင်းဝန်းအကြံပြုဆွေးနွေးကြစေလိုကြောင်းနှင့် ဝန်ကြီးဌာနမှ ပံ့ပိုးဆောင်ရွက်သွားမည့် အခြေအနေများကို ရှင်းလင်းပြောကြားသည်။
ထို့နောက် ပြည်နယ်အားကစားနှင့် ကာယပညာဦးစီးဌာန ပြည်နယ်ဦးစီးမှူးက ဘောလုံးပွဲဖြစ်မြောက်ရေးအတွက် စီမံဆောင်ရွက်ထားရှိမှုအခြေအနေများ၊ လိုက်နာဆောင်ရွက်ရမည့်အချက်များကိုလည်းကောင်း၊ တက်ရောက်လာကြသည့် ကချင်မျိုးနွယ်စုဝင် ဂျိန်းဖော့၊ လာချိဒ် ၊လော်ဝေါ်၊ ဇိုင်ဝါး၊ လီဆူ၊ ရဝမ် စာပေနှင့်ယဉ်ကျေးမှုအဖွဲ့များ၊ ရှမ်းမျိုးနွယ်စုများဖြစ်သည့် တိုင်းလိုင်၊ တိုင်းလုံ၊ တိုင်းလေ၊ တိုင်းဆာ၊ တိုင်းခမ်းတီစာပေယဉ်ကျေးမှုအသင်းများနှင့် ဗမာတိုင်းရင်းသားစာပေနှင့် ယဉ်ကျေးမှုအသင်းများမှ တာဝန်ရှိသူများက ဘောလုံးပြိုင်ပွဲကျင်းပနိုင်ရေး ဘဏ္ဍာငွေရရှိရေးများနှင့် လိုအပ်ချက်များကို အသီးသီးဆွေးနွေးတင်ပြကြသည်။
တင်ပြဆွေးနွေးမှုများအပေါ် ပြည်နယ်ဝန်ကြီးက ဘောလုံးပြိုင်ပွဲ အောင်မြင်စွာ ကျင်းပပြုလုပ်နိုင်ရေး မျိုးနွယ်စုများအချင်းချင်း ညှိနှိုင်းပေါင်းစပ်ဆောင်ရွက်သွားရေးနှင့် မျိုးနွယ်စုတစ်စုလျှင် ငွေကျပ်(၁၀)သိန်းစီနှင့် အားကစားဝတ်စုံများ ထောက်ပံ့ပေးသွားမည်ဖြစ်ကြောင်း ပြောကြားခဲ့သည်။
အဆိုပါ တိုင်းရင်းသားရေးရာဝန်ကြီးဖလား မျိုးနွယ်စုပေါင်းစုံဘောလုံးပြိုင်ပွဲကို ဘောလုံးအသင်း (၁၂) သင်းဖြင့် အုပ်စု (၄) ခုခွဲ၍ ယှဉ်ပြိုင်ကစားသွားမည်ဖြစ်ပြီးလာမည့် အောက်တိုဘာလ ၁၈ ရက် နေ့တွင် စတင်ကျင်းပပြုလုပ်သွားမည်ဖြစ်ကြောင်းနှင့် ပထမတံခွန်စိုက်ဒိုင်းရသည့် အသင်းအား ငွေကျပ် သိန်း ၃၀ နှင့် ကျန်ဆုများကို ထိုက်ထိုက်တန်တန် ချီးမြှင့်ပေးအပ်သွားမည်ဖြစ်ကြောင်း သိရှိရသည်။
