မြစ်ကြီးနား ဖေဖော်ဝါရီလ ၂
ကချင်ပြည်နယ်၊ မြစ်ကြီးနားမြို့နယ်အတွင်းရှိ သစ်မွှေးစိုက်တောင်သူများအား သစ်တောဦးစီး ဌာနက သစ်မွှေးစိုက်ပျိုးထုတ်လုပ်မှု အကြောင်းသိကောင်းစရာများနှင့် စပ်လျဉ်း၍ အသိပညာပေး ရှင်းလင်းဆွေးနွေးပွဲ အခမ်းအနားကို ဖေဖော်ဝါရီ ၁ ရက် မွန်းလွှဲ ၁ နာရီက မြစ်ကြီးနားမြို့နယ် နန်းကွေ့ကျေးရွာအတွင်းရှိ ကျွန်းရွှေစင်ဘုန်းတော်ကြီးကျောင်း၌ ကျင်းပပြုလုပ်သည်။
အဆိုပါ အသိပညာပေး ရှင်းလင်းဆွေးနွေးပွဲ အခမ်းအနားတွင် ပြည်နယ်အစိုးရအဖွဲ့ဝင် သယံဇတရေးရာဝန်ကြီး ဦးတိန့်ဆောင်က ကချင်ပြည်နယ်အနေဖြင့် ကမ္ဘာ့ပထမတန်းစား သစ်မွှေးများ ထွက်ရှိရာ ဒေသတစ်ခုဖြစ်သည့်အပြင် သစ်မွှေးစိုက်ပျိုးခြင်းကို ၂၀၀၇-၂၀၀၈ ခုနှစ်မှ စတင်ခဲ့ကြပြီး မြစ်ကြီးနားမြို့နယ်တွင် ၂၀၂၁-၂၀၂၂ ခုနှစ်၊ စာရင်းများအရ သစ်မွှေးပင်ပေါင်း (၂၅၀၀၀၀) ခန့်ရှိနေသေးသည်ကို သိရှိရပါကြောင်း၊ ထို့အပြင် သစ်မွှေးပင်များသည် ဆေးသွင်းနိုင်သော အသက်အရွယ်နှင့် လုံးပတ်များရှိနေသောကြောင့် စီးပွားဖြစ်ရန် အလားအလာကောင်းများစွာ ရှိနေသည်ကို သိရှိရပါကြောင်း၊ ထို့အတူ သစ်မွှေးဆေးသွင်းစိုက်ပျိုးထုတ်လုပ်ရေး၌ မြစ်ကြီးနားသည် ကမ္ဘာ့သစ်မွှေး ဈေးကွက်တွင် နေရာရရှိနိုင်သော အခြေအနေကောင်းများစွာရှိနေသည့်အပြင် ယနေ့ သုတေသန တွေ့ရှိချက်များအရ ကချင်ပြည်နယ်တွင် သစ်မွှေးနှင့် သက်ဆိုင်သော ရေရှည်တည်တံ့ခိုင်မြဲသည့် ဖွံ့ဖြိုးမှုကို ဦးတည်နိုင်မည့် အစိမ်းရောင် စီးပွားရေးစနစ်ကို ဆောင်ရွက်နိုင်မည်ကို တွေ့ရှိရပါကြောင်းနှင့် ယနေ့ ပညာရှင်များ၏ ဆွေးနွေးမှုကို စနစ်တကျလေ့လာမှတ်သားပြီး စိုက်ပျိုးဆောင်ရွက်ကြရန် လိုအပ်ပါကြောင်း တိုက်တွန်းပြောကြားခဲ့ပြီးတက်ရောက်လာကြသည့် သစ်မွှေးစိုက်တောင်သူများနှင့် စိတ်ပါဝင်စားသူများအား မန္တလေးတက္ကသိုလ်၊ ရုက္ခဗေဒဌာန၊ ပါမောက္ခ(ဌာနမှူး) ဒေါက်တာကလျာလူက မြန်မာ့သစ်မွှေး သုတေသနပါ အချက်များနှင့် စပ်လျဉ်း၍ ကချင်ပြည်နယ်အတွင်း ကမ္ဘာ့ပထမတန်းစား သစ်မွှေးထွက် ရှိရာဒေသများ၊ သစ်မွှေး၏ တန်ဖိုး၊ အသုံးဝင်ပုံနှင့် သစ်မွှေးဆေးသွင်းမှု နည်းလမ်းများနှင့် သစ်မွှေး ဖြစ်မှု ရာခိုင်နှုန်းအခြေအနေများကို နည်းစနစ်ကျ ဆေးသွင်းနိုင်သည့် အချက်များကို အသိပညာပေး ရှင်းလင်းဆွေးနွေးရာ တက်ရာက်လာကြသူများက သစ်မွှေးဆေးသွင်း ထုတ်ယူနိုင်မှု အခြေအနေများ နှင့် စိုက်ပျိုးဆောင်ရွက်ထားရှိမှု အခြေအနေများနှင့် သိလိုသည်များကို မေးမြန်းဆွေးနွေးကြရာ တာဝန်ရှိသူများက ပြန်လည်ရှင်းလင်းဆွေးနွေးခဲ့ကြကာ သစ်မွှေးဖြစ်တည်မှုဖြစ်ပေါ်ခဲ့မှု အခြေအနေများကို ပြသရှင်းလင်းပြီး အဆိုပါ ဘုန်းတော်ကြီးကျောင်းဘေးရှိ သစ်မွှေးခြံ၌ သစ်မွှေးပင်များအား ဆေးသွင်းခြင်းလုပ်ငန်းအား လက်တွေ့သရုပ်ပြ ရှင်းလင်းခြင်းနှင့် ဆေးသွင်းခြင်းဖြင့် သစ်မွှေး ဖြစ်တည်မှု ရာခိုင်နှုန်း ဖြစ်ပေါ်လာမှု အခြေအနေများကို လိုက်လံရှင်းလင်းပြသခဲ့ကြကြောင်း သိရသည်။
